• Сэмэйдик туттуу, сылдьыы, сэмэй үөрэх, сэмэй үлэ, сэмэй олох суолуттан туораабыт дьоннор сир өппүттэрэ, үчүгэйгэ тиийбиттэрэ диэн суох. Куннук Уурастыырап
• Куттал диэн кулут муҥа,

Хоһуун өлөр өстөөҕө,

Куһаҕан эрэ дьоҥҥо

Куйах буолан көстүөҕэ.

Киһи эриэнэ иһигэр,

Сүөһү эриэнэ таһыгар,

Кирдьик бааллар дьиккэрдэр

Үтүө дьон ортотугар.

Таптаа, эн, ол эрээри

Бары дьону долгуйа:

Син биир дьонтон үөрэриҥ

Хомойоргун баһыйыа.

Күлүҥ!

Үөрүҥ, эдэрдэр,

Күлүү — сүрэх ырыата;

Чэгиэн-чэбдик сүрэхтэн

Күлүм күлүү кытыастар.

Семен Данилов

• Кытаанах буол. Кытаанах.

Сыыспыт да күннэргэр.

Саҥа күүһү бул сатаан

Алҕаскын билинэргэр.

Доҕор, атас хайаан да

Өйүү, өйдүү сатыаҕа.

Кыһытан, сиилээн да ааһар

Эйигин суолгар көрсүөҕэ.

Киһи киһилиин өстөһөр,

Мөккүһэр, иэстэһэр.

Билэбин: кыайыаҕа

Кырдьыга, сырдыга.

Орто дойду киһитэ

Тугу эрэ итэҕэйэр.

Туохха эрэ таҥаралыы

Кини үҥэр-сүктэр.

Сорох — үтүө өрөгөйүгэр,

Киһи киһиэхэ эйгэтигэр.

Сорох — дьон өһүөнүгэр,

Ымсыы, иҥсэ илбиһигэр.

Үтүө киһиэхэ дьон, олох

Үтүөнэн эргийэллэр.

Өһүөннэһэр сордоох

Эрэй-муҥ эҥэрдэнэр.

Кыра да үтүө сороҕор

Киһиэхэ наада буолар.

Наталья Харлампьева

• Кыраҕар, кыаммаккар

Сэниир дьон үгүстэр,

Ыалдьыбыт, буомурбут кэмнэргэр

Кэпсэппэт, сэҥээрбэт

Кэмэ суох элбэхтэр.

Икки атахтаах

Орто дойдуга

Олох олорорун тухары

Омнуо майгытыттан

Отох дьылҕаланар.

Семен Маисов

• Киһи барыта үчүгэйдээх,

Хайаан да туох эрэ кэрэлээх,

Ханныкдаҕаны бүтэйбиккэ

Туох эмэ да кыламныыр эбээт.

Сардаана Амгинская