1 Звезда2 Звезды3 Звезды4 Звезды5 Звезд (Пока оценок нет)
Загрузка...
634 просмотров

Үлэ үүнэр, сайдар суол

Бу сааскы бырааһынньык күн чаҕылхай сыламынан толору.   Бэлиэ күн үлэһит дьон сомоҕолоһоро ураты улахан суолталаах. Ил  уонна үлэ өрөспүүбүлүкэбит сайдыытыгар кылааты аҕалар, олугу уурар. Өрөспүүбүлүкэ дьоһун бырайыактары олоххо киллэрэр, ол түмүгэр Саха сирэ сайдыы саҥа таһымыгар тахсыаҕа.

Г.И. Данчикова,

Государственнай Дума депутата

“Эйэ” диэн тыл модун балта буолан сэриини күөртээччи сидьиҥнэр халҕаннарын дирбийиитэ улам күүһүрэн истин, онно биһиги хас бэйэбит илиибит эрчимэ, сүрэхпит тэбиитэ эмиэ холбостун! Эйэ ыраас күнүн уота хараҥаны үүрэн, сири чэлгитэн, бүтүн аан дойду  ньуурун уһуннук сыламнаттын!

***

Үйэ – саас тухары – норуот, эйэ, үлэ үһүөн арахсыспат биирдэр. Киһи аймахха илиинэн оҥоһуллубут, биитэр өйтөн булуллубут күндүттэн күндү туох баарын үлэһит норуот, соҕотох кини айбыта уонна айар. Бу иһин үлэһит норуот алдьатыылаах, талабырдаах сэриигэ хаһан да утары, кини  санаата эйэ – ил, айымньылаах үлэ.

Суорун Омоллоон

Олоххо сайдыыны ситиһэргэ сайдыыны аҕалар баҕа санаалары иҥэринии, оннук үгэстэри үөскэтинии туһалыырын тэҥэ, көрсүө, сэмэй, үлэһит буолуу омук ахсаанын элбэтэр, үлэнэн кыайыылары ситиһэргэ тириэрдэр. Билигин бэлэми үллэстии, түҥэттии кэмэ ааһан, ким бэйэтэ үлэлээн-хамсаан, мунньунан олоҕун оҥостор ырыынак кэмэ кэлбитинэн көрсүө, сэмэй, сыыһа-халты туттубат, үлэни кыайа-хото үлэлиир дьон инники күөҥҥэ сыыйа-баайа тахсан иһиэхтэрэ.

***

Үлэһит киһи өйө-санаата диэн омукка сайдыыны аҕалар туруктаах өй-санаа ааттанар. «Үлэһит киһи оҕото – үлэһит буолар» диэн сахалар этэллэр.  Олоххо көрсөр ыарахаттары тулуйа үөрэнэргэ «Үөрэх ыарахан буоллаҕына олорорго чэпчэки буолар» диэн этиинэн салайтарыахха сөп. Үлэһит киһи оҕотугар туох да улахан баайа-мала суох киһиэхэ, үлэлии-хамсыы, тута-оҥоро үөрэммитэ эрэ кини баар-суох баайа буолар. Үлэлии үөрэммит киһи бэйэтин кыаҕынан үлэлээн-хамсаан хамнас ылар, олоҕун оҥостор, элбэх ситиһиини оҥорор,  салгыы сайдар кыахтанар.

Каженкин И.И. ”Үлэ – олох үөрэҕэ” кинигэтиттэн

Төһө да байдаргын-тотторгун оҕону үлэҕэ сыһыар, олоҕу оҥосторго үөрэт, оччотугар эрэ кэнэҕэски ыччатыҥ киһи киэбин сүтэриэ суоҕа.

Дабыл

Ханнык баҕарар тэрилтэни туруу үлэһиттэр албан ааттыыллар, суон сурахтыыллар.

Морхоева А.А. “Тыа туруу үлэһит дьоно” кинигэтиттэн

Үлэлээн ааспыт араас көлүөнэ дьон көмүс көлөһүннэрэ, билигин үлэлии сылдьар дьон сыралаах үлэлэрин түмүгэ ыччат сайдарын туһугар, олохпут инники хардыылыырын туһугар ананар.

Бястинов Г.-Дьулурҕа. “Тутуу – сайдыыбыт кэскилэ” кинигэтиттэн

Эдэр ыччат – ханнык баҕарар үлэҕэ төһүү күүс, сүрүн илии. Биһиги эдэрдэри өйүүбүт, атахтарыгар туралларыгар көмөлөһөбүт. Биһиги үлэбитигэр салҕааччылар кинилэр буолаллар.  Саха сирин промышленноһа сайдарыгар тирэх, күүс көмө буолуохтарыгар эрэлбит улахан.

***

Эдэр ыччат билигин үлэтин, иннин көрүнэ үөрэниэн наада. Туох барыта үлэттэн кэлэр. Киһиэхэ баҕа наада. Үлэлээтэххинэ, баҕардаххына ханнык баҕарар идэни баһылыаххын сөп. Сайдыан баҕарар киһи сорук – сыал туруорунан хайдах баҕарар сайдар кыахтаах. Үлэһит киһи өйүттэн – санаатыттан тута биллэр.

П.Д. Рахлеев

Үлэ тэрээһинэ бэрээдэктэн тутулуктаах, ол эбэтэр аныгы үйэ киһитэ олорор олоҕун бэйэтин өйүнэн – санаатынан салайтарынан олоруохтаах, киһи олоххо көннөрү көлүүр оҕуһа буолбакка олох дьолуттан, ол үөрүүтүттэн личность буолан туран сомсуһуохтаах.

Н.М. Готовцев

Үлэһит дьон хоннохторун анныгар сырыттаххына үлэҕэ иитиллэҕин. Үлэ киһини киһилии сиэрдиир.

В. Бабанов