Ханна да буоларын курдук, тон сири тобулу анньан, саас аан маҥнайгынан ньургуһун сибэкки тыллар. Бастакы ньургуһунна биһиги – сахалар, ырыаҕа ылланарын курдук, сүрдээҕин сүгүрэйэбит.

Сааскы бастакы сибэкки  туһунан элбэх хоһоон, ырыа айыллар. Ордук биһиэхэ, тыйыс кыһыннаах Саха сирин олохтоохторугар ньургуһун –  олохпут инникигэ эрэлин, кэрэ кэхтибэт күүһүн туоһута.  

      Саха сиригэр ньургуьун 5 көрүҥэ баар. Кини өҥө араас буолар.  Сибэкки  өҥө почва састаабыттан тутулуктаах буолар эбит.

      Өбүгэлэрбит былыр былыргыттан ньургуһуну эмкэ тутталлара. Маныаха сибиэһэйдии ата илик ньургуһуну хомуйан, испииргэ настойкалаан сүһүөх ыарыыларыгар, онтон хатаран баран сөтөлгө, астмаҕа, куртах ыарыыларыгар туһалааҕын бэлиэтииллэр. Ол эрээри,  эмтэнээччи тутаах быраабыланы өйдүөх тустаах.

     Тоҥ буору тобулан тахсар бастакы сибэккибит Кыһыл кинигэҕэ киирбит буолан, дьон-сэргэ болҕомтолоох  сыһыанын  эрэйэр.  

Уһугунна ньургуһун

Ыллыы илик ырыам дуу,

Ыраах-ыраах ырам дуу

Тыллан кэллэ сүрэхпэр,

Тырымнаата харахпар…

Таптал тылын таайтаран,

Санаа кыыма саҕыллан

Сардаҥарда сырдык мичээр,

Үөрдэ, күллэ тулам сэмээр…

Уһугунна нарын иэйии,

Уһугунна үрүҥ айыы,

Уһугунна ньургуһун,

Уһугунна күөх урсун

Махтанабын кэрэ сааска,

Махтанабын эдэр сааска

Ньургуһуннаах кырдалга,

Куруук үүнэр ырааска!

                         Сайа

Тыллыы

Сарсыардам, мичээрдээх сарсыардам,

Сааскылыы сырдыккын, ырааскын,

Сүрэҕим, этигэн сүрэҕим,

Сааскыга, сырдыкка чарааскын.

Кэрэтиэн, айылҕам саҥалыы

Ыраҕа ылларан эрэрэ,

Ымыылаах алааспар сайылыы

Ырыаһыт чыычааҕым кэлэрэ.

Сир ийэм, мин бэйэм уонна эн

Дьолунан долгуйа туолабыт,

Бу тыллыы алыптаах кэмиттэн

Быстыбат ситими тутабыт.

Сарсыардам, мичээрдээх сарсыардам

Күлүмнэс үөрүүгэ кыттыстын,

Тапталым, мин дьиҥнээх тапталым

Ньургуһун кэһиилээх тылыннын.

                           Мария Алексеева