Киин библиотека тэрийиитинэн «Слепцова Нина Ильинична : учуутал, номох буолбут пионер-баһаатай» кинигэ биһирэмэ буолла. Кинигэҕэ Саха сиригэр пионерскай хамсааһын биир бастакы уонна чаҕылхай тэрийээччитэ, Таатта, Мэҥэ Хаҥалас улуустарын бочуоттаах гражданина, талааннаах учуутал, көхтөөх общественник Н.И. Слепцова олоҕо, үлэтэ сырдатыллар.Кинигэни сиэнэ, СӨ доруобуйатын харыстабылын үтүөлээх үлэһитэ, кыраайы үөрэтээччи, хас да кинигэ автора Л.М. Григорьева хомуйан оҥорбут. Нина Ильинична ааспыт үйэ үгүс мөккүөрдээх да, элбэх уларыйыылаах да кэмнэригэр биир чаҕылхай олоҕу олорон ааспыта. Кини олоҕо  билиҥҥэ диэри үгүс киһи өйүгэр-санаатыгар иҥэн хаалбыт.Олорон ааспыт олоҕо номох буолан кэпсэнэ, үйэтитиллэ сылдьар. Аҥардас биир холобурунан «Зарница» оонньууну кини оройуоҥҥа саҕалаабыта күн бүгүҥҥэ диэри тэриллэ сылдьар. кинигэ биһирэмигэр Ытык Күөл оскуолаларын,»Сатабыл» оҕону сайыннарар киин оҕолоро речевка, ырыа ыллаан эҕэрдэлээтилэр. Бэтэрээн пионердары бочуоттаах пионерга ылан долгуттулар. Бииргэ алтыспыт дьоно, аймахтара үтүө киһини ахтан-санаан аастылар, оҕо, эдэр саастарын санаан долгуйа үөрдүлэр. Нина Ильинична аатын оҕо тэрилтэтигэр эбэтэр «Зарница» иҥэриэххэ сөп диэн этии киллэрдилэр.