Ытык Күөллээҕи киин библиотекаҕа 15 кинигэтин бэлэх ууммут ытык киһибитин билиһиннэриэхпитин баҕарабыт.

       Бубякин Иван Афанасьевич—Чөҥөчөк  — Уус Алдан оройуонун Өнөр нэһилиэгэр 1932 с. ыам ыйын 29 күнүгэр төрөөбүтэ. Өнөргө 1943 с. 1-гы кылааһы бүтэрэн, Нам оройуонун Маймаҕа нэһилиэгэр үөрэҕин салҕаабыта. 1952 с. Хатырык 7 кылаастаах оскуолатын, онтон Дьокуускайдааҕы музыкальнай-художественнай училище дирижерскай отделениетын бүтэрбитэ.
       Армияҕа 1954-56 сс. сулууспалаан, ытык иэһин толорон артиллерист-наводчик уонна туйгун десантник буолбута. 1956 с. Хатыҥ Арыыга бибилэтиэкэринэн үлэлээбитэ. 1957 сыл сайыныгар оройуон кулуубугар инструктордаабыта. 1958 с. үөрэҕин бүтэрэн, Чурапчыга үлэлии барбыта.
       Нам сэлиэнньэтигэр 1960 с. аан маҥнай музыкальнай оскуоланы аһан, уһуннук сыратын ууран туран үлэлээбитэ. 1963 с. оскуола дьиэтин кэҥэтэр үлэни ыыппыта. Ииппит аҕатыныын биир сайын турунан туран үлэлээбиттэрэ. Иккиэйэҕин эрэ оһох бөҕөтүн көтүрэн, эргэ дьиэни саҥалыы былааннаан, элбэх дьарыктанар кылаас таһаарбыттара. Онон, күһүн үөрэх дьыла аһыллыытыгар оскуоланы бэлэм оҥорбуттара. Иван Афанасьевич аҕыс сыл дириэктэрдээн, муусука оскуолатын кэҥэтэн атаҕар туруоран, бэрт элбэх оҕо муусука кэрэ эйгэтигэр уһуйуллубуттара, үөрэммиттэрэ, муусукаҕа сыһыаннаах идэни талбыттара.

       Дириэктэр быһыытынан бэйэтин эрэ үлэтинэн муҥурдаммакка, сүрдээх элбэх уопсастыбаннай үлэни толорбута. Партийнай тэрилтэ салайааччыта, идэлээх сойуус бэрэссэдээтэлэ, норуодунай сэтээтэл. Ону сэргэ, элбэх самодеятельнай кэлэктииби тэрийбитэ, салайбыта.

       Хаһыакка үгүс ыстатыйалара, хоһоонноро, ырыалара бэчээттэнэллэрэ. Учуутал, салайааччы, ырыаһыт И. А. Бубякин 1978 с. Нам оройуонун мелодистарын түмсүүтүн тэрийбитэ уонна өр сылларга сатабыллаахтык, айымньылаахтык салайбыта, өрөспүүбүлүкэтээҕи композитордар сойуустарын кытта шефтэһиини олохтообута.

       1957 с. Н. Бойлоховтуун “Ыччат ыллыыр” диэн саха мелодистарын ырыаларын хомуурунньугун таһаартарбыта. Бастакы ырыаларын 1957 сыллаахха И. Гоголев “Комсомолга”, Д. Дыдаев “Ааныскам”, “Тапталлааҕым баарына”, А. Бордников “Айхалланнын үлэ”, “Маарыйа” диэн хоһоонноругар айбыта.

      Үгүс ырыалара норуот айымньытын научнай-методическай киинин музыкальнай пуондатыгар бааллар. “ССРС култууратын туйгуна (1987 с.), самодеятельнай композитор (1978 с.). Композитордар сойуустарын, Култуура министиэристибэтин Бочуотунай грамоталарынан наҕараадаламмыта.

      Айымньылара: “Лена өрүс”- фортепианоҕа аналлаах пьеса, “Отонньуттар үҥкүүлэрэ” – үҥкүү музыката.

      Ырыалара: “Тапталлааҕым баарына”, “Айхалланнын үлэ” (А. Бродников), “Максим Аммосовка” (С. Эльскай), “Үлэ” (М. Тимофеев), “Чаҕылхай Махсыыммыт” (Г. Прядезников), “Нам сирэ” (В. Майскай), “Суох, кэбис тапталым” (П. Тобуруокап), “Уол ырыата” (С. Ильин).

       Нам улууһун, Нам, Маймаҕа нэһилиэктэрин Ытык киһитэ. ССРС култууратын туйгуна, СӨ култууратын үтүөлээх үлэһитэ, СӨ Суруйааччыларын уонна ырыа айааччыларын сойуустарын чилиэнэ, бэйиэт. Ырыа айааччы, кыраайы үөрэтээччи, “Отуу уота” литературнай түмсүү, “Туллук хаара” мелодистар түмсүүлэрин бочуоттаах чилиэнэ.

      Иван Афанасьевич Бубякин-Чөҥөчөк туһунан документальнай киинэни көрүҥ: https://youtu.be/2ZCRROxzGLo?si=6ygQIRKVIUZ-qN4C