Загрузка...
Талааннаах суруналыыс, биллиилээх учуонай, общественнай-политическай деятель Иван Александрович Аргунов 1922 с. ахсынньы ый 24 күнүгэр Таатта улууһун Игидэй нэһилиэгэр төрөөбүтэ. 1941 с. Дьокуускайдааҕы педагогическай училищены бүтэрэн баран Кириэс-Халдьаайыга учууталлаабыта. 1943 с. Аҕа дойдуну көмүскүүр Улуу сэриигэ ыҥырыллыбыта. 1943 с. ыам ыйыттан 92-с мотоциклистар батальоннарыгар сулууспалаабыта, Украинаны, Польшаны нөҥүөлээн сэриини Германияҕа түмүктээбитэ.
1945 сыл ахсынньыга демобилизацияланан кэлэн баран Игидэй сэттэ кылаастаах оскуолатыгар история учууталынан үлэлээбитэ. 1946-50 сс. Дьокуускайдааҕы пединститут историческай факультетын туйгуннук үөрэнэн бүтэрбитэ. Мантан саҕаламмыта кини айымньылаах үлэ үөһүгэр сылдьыыта.
Кини саха сиринээҕи кинигэ кыһатын сүрүн редакторынан, өр сыллар усталарыгар «Эдэр коммунист», «Молодежь Якутии», «Кыым», «Социалистическая Якутия» хаһыаттар редактордарынан, «Советская Россия», ССТА саха сиринээҕи корреспонденынан, Саха АССР үөрэҕин министрин солбуйааччынан, партия саха уобаластааҕы кэмитиэтин пропагандаҕа уонна агитацияҕа отделын сэбиэдиссэйинэн үлэлээбитэ. Иван Александрович Саха республикатын Верховнай Сэбиэтин икки ыҥырыытыгар депутатынан талыллан республика сайдыытыгар үгүс үлэни ыыппыта. Онтон Тыл уонна литература институтугар социологическай чинчийиилэр отделын төрүттээн, ону салайбыта. Кини наукаҕа үлэлээн ураты суолу-ииһи хаалларбыта, айар үлэтин үгэнигэр сылдьан, ыарахан ыарыыга ылларан, 1988 с. сэтинньи 21 күнүгэр олохтон барбыта.
СР Президенин 2010 с. алтынньы 18 к. 313 №-дээх Ыйааҕынан Саха сиригэр социология наукатын биир бастакынан төрүттэспит уонна салайбыт учуонай, суруналыыстыкаҕа, норуот үөрэҕириитигэр дьоһуннаах кылаатын киллэрбит саха саарына И.А.Аргунов аата билиини-көрүүнү тарҕатар Ытык-Күөл киин библиотекатыгар иҥэриллибитэ.