Таатта улууһун Даайа Амматыгар олорор, үлэлиир эдэр учуутал Татьяна Поскачина-Татыйык айар үлэтэ киэҥ эйгэҕэ саҥа биллэн эрэр. Кини бастакы айымньыта – «Сэгэрбэр, Сүнньүөхпэр» диэн кэпсээнэ Интернетинэн тарҕаммытын дьон олус сөбүлээн аахпыта. «Табыллыбат/табыллыбыт таптал. Учуутал күннүгэ» сэһэнэ «Чолбон» сурунаал 2019 с. түөрт нүөмэригэр бэчээттэнэн киэҥ сэҥээриини ылбыта. Айымньы икки чаастан турар кинигэтэ «Айар» кинигэ кыһатыгар 2021-2022 сс. бэчээттэнэн тахсыбыта.

Айымньы күннүк ньыматынан суруллубут. Ааптар бэйэтэ «күннүгү сурунар идэлээх буоламмын бу ньыма миэхэ быдан чугас» диэн бэлиэтиир. Күннүк атырдьах ыйын 31 күнүттэн саҕаланар. Сэһэн сүрүн темата – саҥа үөрэҕин бүтэрэн оскуолаҕа үлэлии тиийбит эдэр учуутал Нина Семеновна уонна онус кылаас үөрэнээччитэ Арыйаан икки ардыларыгар истиҥ сыһыан, ыраас таптал иэйиитэ. Айымньы сүрүн санаата – таптал сааһы, кэми-кэрдиини билиммэт диэн. Нина Семеновна «уустук» кылааһын оҕолорун тустарыгар олус кыһамньылаах учуутал, идэтин таптыыр үлэһит буолара арылхайдык көстөр. Ол эрээри уһулуччу учуутал буолуоҕун кини үөрэнээччитигэр күүстээх таптала харгыстыыр. Айымньыга Арыйаан уобараһын бары өттүнэн ситэри, чорбойор уобарас диэн сыаналыахха сөп. Бастаан омсолоох эрээри, кэлин үчүгэй персонажка кубулуйара көстөр. Геройдар тыллара-өстөрө аныгы ыччат тылынан бэриллибит буолан, дьиҥнээх олоххо көстөр мөккүөрдэр киирбиттэрэ ааҕааччыга ордук тиийимтиэ буолара бэлиэтэнэр. Сэһэн буола турар быһыыга-майгыга уйаҕас иэйиини саба тутар, баттыыр ыараханын итэҕэтиилээхтик көрдөрөр. Айымньы бүтэһигэр Нина дойдутугар Чагдаҕа төннөн бибилэтиэкэҕэ үлэлии киирэрэ, Арыйаан киниэхэ айаннаан тиийэн эйэлэһэллэрэ ойууланар.

«Табыллыбат/табыллыбыт таптал. Учуутал күннүгэ» сэһэн туһунан «Чолбон ырытыыта» рубрикаҕа сурунаал 2019 с. 4-с нүөмэригэр тахсыбыта. Аныгы олох араас өрүттэрин сонуннук, сэргэхтик көрдөрөр айымньыны ааҕыҥ, тарҕатыҥ, ырытыһыҥ.